विराटनगर। मोरङको रतुवामाईमा हिन्दु धर्मावलम्बीहरुको महान चाड शुभ दिपावली तथा छठ पर्वको अवसरमा यस वर्ष पनि बृहत लोक सांस्कृतीक कार्यक्रम हुने भएको भएको छ ।
स्थानीय सिद्धार्थ युवा क्लबको अयोजनामा यस वर्ष पनि भाइटिकाको भोलिपल्ट अगामी कात्तिक २१ गते आइतबार रतुवामाई नगरपालिका–६ स्थित शनिश्चरे बजारमा बृहत लोक सांस्कृतिक कार्यक्रम हुने भएको हो ।
सिद्धार्थ युवा क्लबले विगत १४ वर्षदेखि स्थानीय लोक संस्कृतिको जगेर्ना गर्ने उद्देश्यले निरन्तररुपमा वर्षेनी दिपावली तथा छठ पर्वको अवसर पारेर भाइटिकाको भोलिपल्ट बृहत लोक सांस्कृतिक कार्यक्रम आयोजना गर्दै आएको छ ।
‘संस्कृति जगेर्ना गरौँ, संस्कृति बचाऔँ’ भन्ने मुल नाराका साथ यस वर्ष पनि भव्यरुपमा लोक सांस्कृतिक कार्यक्रम आयोजना गरिएको सिद्धार्य युवा क्लबका अध्यक्ष राजन निरौलाले जानकारी दिए ।
उनले प्रत्येक वर्ष स्थानिय सस्कृतिलाई लोप हुन नदिन र संस्कृतिको जगेर्ना गर्नका लागि भव्यरुपमा कार्यक्रम गरिँदै आएको बताए । अध्यक्ष निरौलाले यस वर्ष पनि कार्यक्रमका लागि झण्डै तीन साता अघिदेखिनै तयारी तिब्र पारिएको जानकारी दिए ।
सिद्धार्थ युवा क्लबमा आवद्ध स्थानीय युवाहरुको अग्रसरतामा आयोजना हुने बृहत लोक सांस्कृतिक कार्यक्रम जिल्लामै उदाहरणीय बन्दै आएको छ ।
जिल्लामै नमुना र उदाहरणीय कार्यक्रम हुने भएकाले छिमेकी पालिकासहित टाढा–टाढाबाट समेत दर्शकहरु लोक सांस्कृतिक कार्यक्रम हेर्न आउने गरेका छन् ।
सो अवसरमा विभिन्न जातजातीका कला, संस्कृती, झाँकी, नृत्य, गायनलगायत मनोरञ्जनात्मक कार्यक्रमहरु हुने गरेको छ । कार्यक्रममा विभिन्न राष्ट्रियस्तरका ख्यातीप्राप्त कालाकारहरुको प्रस्तुतीसमेत रहने क्लबका अध्यक्ष निरौलाले जानकारी दिए । सो दिन शनिश्चरे बजारमा दर्शकहरुको उल्लेख्य भिड लाग्ने गरेको छ भने मेला समेत लाग्दै आएको छ ।
