विराटनगर, १ साउन । रोटरी क्लब अफ विराटनगर डाउनटाउनले आयोजना गरेको ‘रोटरी ट्रेड फेयर २०२२–२३’ भव्यरुपमा सम्पन्न भएको छ । महिला शसक्तिकरण र आर्थिक रुपमा महिलाहरुलाई सबल बनाउन प्रत्येक वर्ष आयोजना हुँदै आएको रोटरी ट्रेड फेयर यस वर्ष पनि भव्यरुपमा सम्पन्न भएको हो ।
रोटरी क्लब अफ विराटनगर डाउनटाउनले प्रत्येक वर्ष आयोजना गर्दै आएको रोटरी ट्रेड फेयर गत वर्ष कोरोना महामारीका कारण हुन सकेको थिएन । तर, यसवर्ष असार ३१ देखि ३२ गतेसम्म दुई दिन सयौँ महिलाहरुको उत्साहजनक सहभागितामा ‘रोटरी ट्रेड फेयर २०२२–२३’ भव्यरुपमा सम्पन्न भएको रोटरी क्लब अफ विराटनगर डाउनटाउनकी अध्यक्ष रेखा राठीले जानकारी दिइन् ।
उनले डाउनटाउनले ‘रोटरी ट्रेड फेयर विगत १५ वर्षदेखि निरन्तर आयोजना गर्दै आएको बताइन् । यस वर्षको ‘रोटरी ट्रेड फेयर २०२२–२३’ को उद्घाटन प्रमुख अतिथी रहेका रोटरीयन बेनिगोपाल मुण्दडाले गरेका थिए ।
रोटरी ट्रेड फेयरमा महिलाहरुलेनै उत्पादन गरेका खाद्यान्न, लत्ताकपडा, गरगहना, राखि, घर सजावटका सामाग्रीहरु र विभिन्न मिठा–मिठा परिकार भएका खानासहित ३२ वटा स्टलहरु राखिएको थियो ।
रोटरी ट्रेड फेयरमा घुम्न र अवलोकन गर्न आउनेहरुका लागि सांगीतिक कार्यक्रम (कन्सर्ट) समेत राखिएको थियो । सो मेला जोगवनीसहित सीमावर्ती भारतीय गाउँहरु, विराटनगर, धरान, इटहरीसहित विभिन्न स्थानबाट आएका हजारौँले अवलोकन गरेको क्लबकी सचिव नमिता टिवडेवालले जानकारी दिइन् । रोटरी ट्रेड फेयरमा ४ हजारदेखि ५ हजार जनासम्म मानिसहरुको सहभागिता थियो ।
