विराटनगर, १२ आसार । विभिन्न सामाजिक कार्यहरु नियमित रुपमा गर्दै आएको रोटरी क्लब अफ विराटनगर डाउनटाउन उत्कृष्ट बनेको छ । शिक्षा, स्वास्थ्य, वातावरण संरक्षणलगायत विभिन्न सामाजिक कार्यमा निरन्तर काम गर्दै आएको डाउनटाउन यस वर्ष उत्कृष्ट बनेको हो ।
रोटरी क्लब अफ विराटनगर डाउनटाउनमा महिलाहरु मात्र आवद्ध छन् । क्लबले वर्षदिनभरी गरेको सामाजिक कामको मुल्यांकनका आधारमा उत्कृष्ट भएको हो । रोटरी क्लव अफ विराटनगर डाउनटाउनले यो वर्ष विभिन्न २२ वटा अवार्ड हासिल गरेको छ ।
अध्यक्ष रेखा राठीको नेतृत्वमा रहेको कार्यसमितिलाई काठमाडौँमा डिस्ट्रिक्ट अवार्ड वितरण विशेष समारोहमा उक्त अवार्ड प्रदान गरिएको हो । ’हामी गौरवान्वित छौं’ राठीले भनिन्, ’यसले सामाजिक कार्यमा डाउन टाउनको भूमिकालाई स्थापित गरेको छ।’
क्लवले आउट स्टयाण्डिङ क्लव अफ दी इयर, आउट स्टयाण्डिड प्रेसिडेण्ट अफ दी डिष्ट्रिक्ट, बेष्ट एजी अफ रिजन ७, वेष्ट प्रेसिडेण्ट रिजन ७, सर्भिस प्रोजेक्ट, इकोनोमिक कम्युनिटी डेभलभमेण्ट, मिडिया कभरेजलगायतका २२ अवार्ड हात पारेको हो ।
