विराटनगर । नेकपा (एमाले) मोरङले ग्रामथानमा आयोजना गरेको जिल्ला स्तरीय कार्यकर्ता भेला तथा प्रशिक्षण कार्यक्रम भव्यरुपमा सम्पन्न भएको छ । आगामी मंसिर १६ गते ग्रामथानको अध्यक्ष पदका लागि हुने निर्वाचनलाई लक्षित गर्दै एमाले मोरङको आयोजना तथा ग्रामथान गाउँकमिटीको व्यवस्थापनमा ग्रामथान–२ झोराहाट स्थित गोपीकृष्ण मनिकर्निका सेवा केन्द्रको सामुदायीक भवनमा कार्यकर्ता भेला तथा प्रशिक्षण कार्यक्रम सम्पन्न भएको हो ।
नेकपा (एमाले) मोरङका अध्यक्ष बाबुराम कार्कीको अध्यक्षता तथा महासचिव शंकर पोखरेलको प्रमुख आतिथ्यता कार्यक्रम भव्यरुपमा सम्पन्न भएको छ । प्रशिक्षणको उद्घाटन महासचिव पोखरेलले गरे । लगतै एमाले मोरङका अध्यक्ष कार्कीले आगामी उपनिर्वाचनमा तुलसीराम विश्वासलाई उम्मेदवारको रुपमा घोषणा गर्नुभयो ।
सो अवसरमा प्रशिक्षण दिँदै महासचिव पोखरेलले समाजलाई बदल्न चुनावमा एमालेको जित आवश्यक रहेको बताउनुभयो । उहाँले उपनिर्वाचन एमालेको मिसन ८४ का लागि ठुलो अवसर भएको महासचिव पोखरेलको भनाई छ । जिम्मेवारीका साथ पार्टीका नेता कार्यकर्ताहरुले काम गर्नुपर्नेमा उहाँले जोड दिनुभयो । उहाँले भन्नुभयो,‘ पार्टी र मुलुकको भविश्यको सफलताको रुपमा यो चुनाब लिनु पर्छ ।’
उहाँले माओवादी भ्रष्टाचारमा चुर्लुम्म डुबेपनि उल्टै आरोपजति जबरजस्ती एमालेमाथि थोपर्न खोजेको बताउनुभयो । ‘जतिपनि भ्रष्टाचारका कुराहरु आएका छन् । ति सवैमा प्रचण्ड नेतृत्वको सरकारको संलग्नता र निर्णय छ ।’ उहाँले भन्नुभयो,‘भ्रष्टाचार उनीहरुले गर्ने, अनि मिथ्या आरोप जती एमालेलाई लगाइरहेका छन् ।’
महासचिव पोखरेलले विरोधीले एमालेलाई समाप्त पार्ने अनेक प्रपन्च गरेपनि नेपाली जनताले सफल हुन नदिएको बताउनुभयो । उहाँले देशको सच्चा राष्ट्रवादी पार्टी एमाले मात्र भएको जनताले राम्रोसँग बुझेको बताउँदै पार्टीविरुद्ध रचिने कुनै पनि षड्यन्त्र जनताले विफल पार्ने दावी गर्नुभयो । स्थायी कमिटी सदस्य तथा कोशी प्रदेश इन्चार्ज शेरधन राईले आगामी मंसिर १६ गते हुने उपचुनावमा कुनै भ्रममा नपरी चुनावको प्रचार प्रसारमा लाग्न कार्यकर्तालाई निर्देशन दिनुभयो ।
उहाँले सिंगो पार्टी शक्तिलाई व्यवस्थित र प्रभावकारी रुपमा चुनावमा परिचालन गर्न समेत आग्रह गर्नुभयो । कोशी प्रदेशका संस्थापक मुख्यमन्त्री राईले एमालेले मिसन ८४ को लक्ष्य तय भइसकेको भन्दै यो लक्ष्यलाई पुरा गर्न पछिल्लो समय पार्टी शुद्धिकरण र सुदृढिकरणको अभियान तीव्र गतिमा अघि बढाइएको बताउनुभयो ।
कोशी प्रदेशका मुख्यमन्त्री तथा स्थायी कमिटी सदस्य हिक्मतकुमार कार्कीले कानून विपरित काम गर्ने कसैलाई छुट नभएको बताउनु भयो । उहाँले अहिलेको शासन व्यवस्थाले कानुन विपरित कार्य गर्नेलाई कानुनको दायरामा ल्याउने काम गरेको बताउनुभयो । उहाँले अहिलेको राजनीतिक प्रणाली सवै भन्दा राम्रो व्यवस्था भएको बताउनुभयो । उहाँले भन्नुभयो,‘ यसको विकल्प अरु हुन सक्दैन ।’ उहाँले नेकपा एमालेको संगठनलाई शसक्त बनाउने काममा लाग्न एमाले कार्यकर्ताहरुलाई आग्रह समेत गर्नुभयो ।
केन्द्रीय सदस्य तथा मोरङ इन्चार्ज जीवन घिमिरेले अहिले पार्टीको ध्यान मंसिर १६ गतेको निर्वाचनमा केन्द्रीत भएको बताउनुभयो । उहाँले एमाले उम्मेदवारलाई विजयी गराउने कार्यमा लाग्न सम्पूर्ण नेता कार्यकर्तालाई आग्रह गर्नुभयो ।
उहाँले निर्वाचनमा एक ढिक्का भएर लाग्नु पर्नेमा जोड दिनुभयो । केन्द्रीय सदस्य भगवती चौधरी, कोशी प्रदेश कमिटी अध्यक्ष घनश्याम खतिवडाले निर्वाचनको परिणामा एमालेको पक्षमा पार्न सवै नेता कार्यकर्ता एकढिक्का बनेल लाग्नुपर्ने बताउनुभयो ।
कार्यक्रममा एमाले मोरङका अध्यक्ष कार्कीले आगामी निर्वाचनलाई मध्यनजर गर्दै प्रशिक्षण कार्यक्रम आयोजना गरिएको जानकारी दिनुभयो । उहाँले आगामी २०८४ सालको निर्वाचनमा एमालेलाई मोरङका सबै स्थानीय तह, प्रदेश र संघीय निर्वाचन क्षेत्रमा विजय गराउने गरी संगठन सुदृढी कारणमा समेत लागिएको बताउनुभयो । उहाँले उद्देश्य अनुसार प्रशिक्षण कार्यक्रम भव्यरुपमा सफल भएको बताउँदै सवैलाई धन्यवाद ज्ञापन गर्नुभयो ।
कार्यक्रममा केन्द्रीय सदस्य नैनकला ओझा, रामलाल साह, प्रदेश कमिटी अध्यक्ष घनश्याम खतिवडा, केन्द्रीय सल्लाहकार विनोद ढकाल, प्रतिनिधिसभा सार्बजनिक लेखा समितिका सभापति ऋषिकेश पोखरेल, प्रदेश सांसदहरु, स्थानीयतहका प्रमुख उपप्रमुख, जनप्रतिनिधिहरु पार्टी केन्द्रीय कमिटी र निकायका नेताहरु, प्रदेश कमिटीका नेताहरु, जिल्ला कमिटी, जनसंगठनका केन्द्र, प्रदेश र पालिका कमिटीकालगायत अगुवा कार्यकर्ताहरु सहित हजारौँको संख्यामा उपस्थिती रहेको एमाले मोरङका सचिव रविन थापाले जानकारी दिनुभयो ।
सो अवसरमा एमाले मोरङका अध्यक्ष कार्कीले महासचिव पोखरेललाई पार्टी जिल्ला कमिटीले तयार पारेको मोरङ जिल्लाको समृद्धिको कार्ययोजना समेत बुझाउनु भएको छ ।
प्रशिक्षण कार्यक्रम सँगै ग्रामथान गाउँपालिकाको अध्यक्ष पदमा हुने निर्वाचनको महोल एमाले उम्मेदवार विश्वासको पक्षमा देखिएको छ । स्थानीयस्तरमा निकै लोकप्रीय विश्वासलाई एमालेले उम्मेदार बनाएपछि अन्य दलहरुको मनोबल कमजोर भएको स्थानीयवासीले बताएका छन् ।
