रंगेली । मोरङको रंगेलीमा एक लाख रुपैयाँको चेकलाई २१ लाख बनाएर ठगीको प्रयास गर्ने एक व्यक्ति कानुनी फन्दामा परेका छन् । व्यक्तिगत लेनदेनमा एक लाख रुपैयाँको चेक लिएका स्थानीय राजेशकुमार साहले त्यसमा अंक थपेर २१ लाख बनाई ठगी गर्ने प्रयास गरेपछि कानुनी फन्दामा परेका हुन् ।
साहलाई लेनदेन मिलाउन रंगेली– ६ स्थित चोप्राहका पन्नालाल मण्डलले प्रभु बैंकमा खाता रहेको १ लाख रुपैयाँको चेक काटेर साहलाई दिएका थिए । तर, साहले १ लाख रुपैयाँको उक्त चेकमा २ थपि अंक र अक्षरमा २१ लाख बनाएर ठगी गर्ने प्रयास गरेको खुलेको थियो । साहले एसिपेयी चेक भएकाले क्लियरेन्सका लागि रंगेलीस्थित नेपाल बैंक लिमिटेडमा जम्मा गरेपछि घटना बाहिर आएको हो ।
जनता समाजवादी पार्टी रंगेलीका नेतासमेत रहेका मण्डलले एक लाख रुपैयाँको चेक दिएपनि साहले २१ लाख बनाएको थाहा पाएपछि आफ्नो होस् हवास उडेको बताए । ‘हाम्रो लेनदेन भएकाले एक लाखको चेक दिएपछि लेनदेनको विषय टुंगीएको थियो ।’ मण्डलले पूर्वी टाईम्ससँग भने,‘तर, उहाँले मलाई बदनाम गर्ने र फसाउने गलत नियतले चेकमा आफै अंक र अक्षर थपेको थाहा पाएपछि म छांगाबाट खसेजस्तै भएँ । मानसिकरुपमा निकै तनाबमा परेकाले कानुनी उपचारमा लागेको छु ।’
मण्डलले आफुविरुद्ध ठगीको प्रयास भएको र बद्नाम गराउने नियतले साहले चेक दुरुपयोग गरेको भन्दै इलाका प्रहरी कार्यालय रंगेलीमा जाहेरी दिएका छन् । मण्डलको जाहेरीलगत्तै प्रहरीले साहलाई पक्राउ गरेको छ । मोरङ प्रहरीका प्रवक्ता प्रहरी नायव उपरिक्षक वेद प्रकाश जोशीले साहलाई नियन्त्रणमा लिइएको पुष्टि गरे । ‘साहले चेकमा लेखिएको अंकमा १ को अगाडी २ र अंग्रेजीमा लेखिएको अक्षरमा वान को अगाडी ट्वान्टी थपेर ट्वान्टी वान बनाई २१ लाख बनाएका रहेछन् ।’ प्रवक्ता जोशीले पूर्वी टाईम्सलाई भने,‘हामीले अहिले उनलाई नियन्त्रणमा लिएर थप अनुसन्धान गरिरहेका छौँ ।
प्रवक्ता जोशीका अनुसार साहविरुद्ध बैकिंङ कसुर अन्तर्गत कारबाही प्रकृया अघि बढ्नेछ ।
उता साहले पनि चेकमा आफूले हेरफेर गरेको भन्दै गल्ती स्वीकार गरेका छन् । उनले आइन्दा आफुले यस्तो गल्ती नगनेृ भन्दै माफी मागेको स्रोतले जनाएको छ ।
