रंगेली नगरपालिका–५, आमगाछी स्थित वडा कार्यालयमा आइतबार लागू औषध दुरुपयोग सम्बन्धी एक दिने सचेतना कार्यक्रम सम्पन्न भएको छ।
रंगेली नगरपालिकाको आयोजनामा तथा इलाका प्रहरी कार्यालय, रङ्गेलीको सहकार्यमा सञ्चालन भएको कार्यक्रममा श्री जनता मावि, रंगेली–५ का ४० जना विद्यार्थी तथा १५ जना अभिभावकहरूको सहभागिता रहेको थियो।
कार्यक्रमका अध्यक्ष वडा नं. ५ का वडाध्यक्ष महानन्द मण्डल थिए भने प्रमुख अतिथि उपमेयर भूमा पराजुली तथा विशिष्ट अतिथि इलाका प्रहरी कार्यालयका प्रमुख सन्तोष खड्का रहनुभएको थियो।
इलाका प्रहरी कार्यालयका प्रमुख खड्काले लागू औषधको दुरुपयोगमा परिसकेका व्यक्तिहरूलाई यस दुर्घटनाबाट मुक्त गराउनु कार्यक्रमको मुख्य उद्देश्य रहेको बताए। साथै, रङ्गेलीको वडा नं. ४, ६, र ७ सिमावर्ती क्षेत्र (बोर्डर एरिया) परेकाले त्यहाँका बालबालिकाहरू लागू पदार्थको कुलतमा फस्ने सम्भावना बढी हुने जानकारी दिँदै विद्यार्थीहरूलाई यस्ता नराम्रो लतबाट जोगिन आग्रह गरे।
कार्यक्रमका प्रमुख प्रशिक्षक इलाका प्रहरी कार्यालय, रङ्गेलीका प्रमुख सन्तोष खड्का नै रहनु भएको थियो।
