मोरङ, रङ्गेली — समाजसेवामा सक्रिय रङ्गेली नगरपालिका–९ निवासी सुरज यादव र उनकी पत्नी रिंकी यादवले इलाका प्रहरी कार्यालय दोहनलाई करिब ३० लाख रुपैयाँ मूल्य बराबरको १६.५ धुर जग्गा दान गरेका छन्।
मङ्गलबार मालपोत कार्यालय रङ्गेलीमा जग्गादाता समाजसेवी यादवले, दोहमना प्रहरी इन्चार्ज पूर्ण बहादुर केसी , इलाका प्रहरी कार्यालय इन्सपेक्टर नरेन्द्र कुमार बोगटी , पत्रकार र लेखा व्यवसायी विपिन सापकोटाको उपस्थितिमा करिब ३० लाख पर्ने उक्त जग्गा कानुनी प्रक्रिया सम्पन्न गरी इलाका प्रहरी कार्यालय दोहमना को नाममा नामसारी गरिएको छ।
स्थानीय शान्ति र सुरक्षाको प्रवर्द्धनमा सघाउ पुर्याउने उद्देश्यले जिर्ण अवस्थामा रहेको प्रहरी कार्यालयलाई नयाँ भवन निर्माणका लागि उनीहरूले आफ्नो निजी जग्गा उपहारस्वरूप प्रदान गरेका हुन्।
आफ्नो गाउँ ठाउँ आफै बनाउनुपर्छ। यहाँको सुरक्षा र शान्ति कायम राख्न आवश्यक पूर्वाधारहरू निर्माण गर्न हामी सबैको दायित्व हो। त्यही दायित्व लाई सम्झिँदै सहयोग गरेको हुँ ‘ यादव दम्पतिले जनाएको छ।
इलाका प्रहरी कार्यालय दोहनका प्रमुखले यादव दम्पतीप्रति आभार व्यक्त गर्दै यो कदमले स्थानीय तहमा प्रहरी र नागरिकबीचको सम्बन्ध थप बलियो हुने विश्वास व्यक्त गरे। 
