विराटनगर, ६ असोज । निरन्तर विभिन्न सामाजिक कार्य गर्दै आएको रोटरी क्लब अफ विराटनगर डाउनटाउन ले ‘विद्यालय फर्क’ अभियान सञ्चालन गरेको छ । विभिन्न समस्या र अभिभावकहरुमा जनचेतनाका कारण विद्यालय छाडेका बालबालिकाहरुका लागि क्लबले विद्यालय फर्क अभियान सञ्चालन गरेको हो ।
क्लबले गत वर्ष सञ्चालन गरेको ब्याक टु स्कुल परियोजनालाई यसपटक पनि निरन्तरता दिएको हो । जसका लागि क्लबले विराटनगरकै बखरी आधारभूत विद्यालयका ३० जना विद्यार्थीहरूलाई घरबाट स्कूलसम्म जान र आउनको लागि, यातायात सुविधा प्रदान गर्दै आएको छ ।
विराटनगरस्थित खार्जीको ज्योति आधारभूत विद्यालयमा पनि ‘ब्याक टु स्कूल’ अभियान क्लबले सञ्चालन गरेको हो ।
क्लबकी अध्यक्ष रेखा राठी, सेवा परियोजना प्रमुख सन्तोष तोदी र रोटर्याक्ट्सले खर्जी गाउँका सबै घर–घरमा विद्यार्थी विशेष गरी छात्राहरूको संख्या पत्ता लगाउन र पढाई छाड्नुको कारण पत्ता लगाउन सर्वेक्षण गरेका थिए ।
त्यसपछि क्लबले अभिभावकहरूसँग भेटघाट गरिशिक्षाको महत्वबारे प्रकाश पारेका थिए । सो अबसरमा रोटरी क्लब अफ विराटनगर डाउनटाउनका का पूर्व अध्यक्ष सन्तोष जैनले अभिभावकहरुलाई शिक्षाको महत्वबारे बताए । सोही अभियान मार्फत क्लबले विद्यालय छाडेका बालबालिकालाई विद्यालयमा फर्काउन सफल भएको छ ।
