विराटनगर, ११ पुस । झापाको दमकका समाजसेवी युवाहरुले दुवै मृगौला फेल भई उपचाररत मोरङको रतुवामाई–३ का पिटर ताजपुरियालाई आर्थिक सहयोग गरेका छन् ।
झापाको दमकका बिनोद दास सहितको टिमले विगत २ वर्ष देखि दुवै मृगौला फेल भई नोबेल अस्पताल बिराटनगरमा उपचाररत ताजपुरियालाई नगद साढे ५२ हजार रुपैयाँ आर्थिक सहयोग गरेका हुन् ।
उनीहरुले सोमबार ताजपुरियाको घरमै पुगेर सहयोग रकम प्रदान गरे । दासहितको तिलक भण्डारी, ममत राई, आश्मा नेपाली, मनु लिम्बू, तारा लाल ताजपुरिया, झरना रम्तेल, कुमार लामिछाने, सीता तामाङलगायतको टिमले दमक बजार आसपासका क्षेत्रमा आर्थिक संकलन गरि ताजपुरियालाई हस्तान्तरण गरेका हुन् ।
ताजपुरियाको मृगौला प्रत्यारोपण गर्नका लागि थप आर्थिक सहयोगको आवश्यकता रहेको उनको परिवारले जनाएको छ । आफुहरुको आर्थिक अवस्था कमजोर रहेकाले थप सहयोग गरी आफ्नो छोराको जीवन रक्षा गरिदिन बिरामीका बुवा प्रेम सिंह ताजपुरियाले आग्रह गरेका छन् ।
पिटरको उपचारका लागि उनकै नाममा खोलिएको राष्ट्रिय बाणिज्य बैंकको खाता नम्बर २५९०१००००१८३१०१० मा रकम जम्मा गरि जीवन रक्षाका लागि सहयोग गर्न स्थानीय समाजसेवी रमेश सिंहले अपिल गरेका छन् ।
