विराटनगर, २१ मंसिर । मोरङको रंगेली नगरपालिकाको शिक्षा ऐन २०७९ पारित भएको छ । बिहिबार सातौँ नगरसभाले शिक्षा ऐन पारित गरेको हो ।
सो ऐन राजपत्रमा प्रकाशित भएपछि लागु हुनेछ । सातौँ नगरसभामा मेयर दिलिप बगडीयाले रंगेली–३ का वडाध्यक्ष एवम् विधेयक समितिका संयोजक भरत प्रसाईँलाई ऐन प्रस्तुत गर्न समय उपलब्ध गराएका थिए । प्रसाईँले प्रस्तुत गरेको शिक्षा ऐन २०७९ उपरको छलफलमा नगरसभा सदस्यहरुले भाग लिएका थिए ।
लगत्तै छलफलमा उठेका विषयवस्तुहरुको संयोजक प्रसाईँले जवाफ दिए । संयोजक प्रसाईँको जवाफपछि मेयर बगडीयाले निर्णयार्थ प्रस्तुत गर्दा शिक्षा ऐन २०७९ पारित भएको हो ।
त्यस्तै नगरसभामा मेयर बगडीयाले पेश गरेका सवै प्रस्तावहरु पास भएका छन् । नगरसभाले कार्यपालिकाबाट पेश हुन आएको म.ले.प. प्रतिवेदन आर्थिक वर्ष २०७५/०७६, २०७६/०७७ र २०७७/०७८ का नियमित गर्ने तथा फस्र्यौट गर्ने बेरुजु अनुमोदन गरेको छ ।
त्यस्तै, योजना तथा कार्यक्रम संशोधन रकमान्तर अनुमोदन, एकिकृत विपद व्यवस्थापन केन्द्रका लागि जग्गा खरिद, करार सेवा तथा ज्यालादारी कर्मचारीको म्याद थप, घर नक्सा अभिलेखिकरण म्याद थप अनुमोदन गरेको छ ।
त्यसैगरी हदबन्दीको जग्गा सम्बन्धी प्रस्ताव समेत अनुमोदन भएको छ । नगरसभाले निशुल्क औषधी खरीदको लागि अस्पताललाई अनुदान, स्वास्थ्य शाखाबाट औषधी खरीद, वितरणको लागि खर्च भएको रकम, जिल्ला समन्वय समितिबाट प्राप्त हने रकम विनियोजन गरिएको अनुमोदन गरेको रंगेली नगरपालिकाका योजना अधिकृत कृष्ण भट्टराईले जानकारी दिए ।
अधिकृत भट्टराईका अनुसार नगरसभाले योजनाको लागि अपुग हनुसक्ने रकमलाई व्यवस्थापन गरिएको पनि अनुमोदन गरेको छ । त्यस्तै, विभिन्न योजनाको म्याद थप गर्ने विषय समेत अनुमोदन भएको छ ।
त्यसैगरी धरौटी रकम सदर स्याहा गर्ने र नगर कार्यपालिकाबाट चालु आर्थिक वर्षमा भएका निर्णयहरुसमेत अनुमोदन भएको अधिकृत भट्टराईले बताए ।
सातौँ नगरसभा भव्य र सफलतापूर्वक सम्पन्न भएको छ । नगरसभामा मेयर बगडीयाले जनप्रतिनिधि र कर्मचारीहरुलाई परिणाम मुखि काम गर्न निर्देशन समेत दिएका थिए ।
