विराटनगर । कोशी प्रदेश खेलकुद विकास बोर्डले विकास र शान्तिका लागि अन्तर्राष्ट्रिय खेलकुद दिवस विभिन्न कार्यक्रम गरि मनाएको छ । बोर्डले आज विराटनगरमा बृहत्त् र्यालीसहित विभिन्न कार्यक्रमको आयोजना गर्दै अन्तर्राष्ट्रिय खेलकुद दिवस मनाएको हो ।
विराटनगरस्थित सहिद रंगशालाबाट सुरु भएको र्याली हस्पिटलचोक , जलजला चोक, गोल्छा चोकहुँदै बोर्डको कार्यालयमा पुगेर समापन भएको थियो ।
बोर्डको कार्यालयमा र्याली समापन पछिको शुभकामना आदानप्रदान कार्यक्रममा बोल्दै कोशी प्रदेशका सामाजिक विकास मन्त्री पाँचकर्ण राईले नवौं राष्ट्रिय खेलकुदमा प्रदेशले हासिल गरेको नतिजालाई भन्दा उत्कृष्ट नतिजा ल्याउनेगरी १०औं खेलकुदको तयारीका लागि जुटेको बताउनु भएको थियो। राईले हालै सम्पन्न कोशी प्रदेश खेलकुद महोत्सव पनि राष्ट्रिय खेलकुद प्रतियोगिता तयारीको एक स्वरूप भएको धारणा व्यक्त गर्नुभएको थियो।
बोर्डका सदस्यसचिव कृष्ण बस्नेत (पर्शुराम)ले दशौं राष्ट्रिय खेलकुदको तयारीस्वरूप बोर्डले विभिन्न प्रतियोगिताहरू आयोजना गरिरहेको जानकारी दिनुभएको थियो।
‘खेलाडीले खेलेरै जीवन निर्वाह गर्न सक्छन् भन्ने कुरालाई स्थापित गर्नका लागि हामीले निरन्तर रूपमा खेल गतिविधि गरिरहेका छौं,’ बस्नेतले प्रष्ट पार्नु भयो , ‘खेलकुद महोत्सवले अरू प्रदेशलाई पनि सकारात्मक सन्देश दिएको छ । हामीले राम्रै प्रतिक्रिया पाइरहेका छौं ।’
त्यस्तै , सामाजिक विकास मन्त्रालयका निमित्त सचिव दामोदर फुयाँलले खेलकुद चलायमान बनाउन बोर्ड सक्रियताका साथ अगाडि बढिरहेको बताउनु भएको थियो ।
खेलकुद दिवसकै अवसर पारेर सोमबार बोर्ड परिसरमा योगाका विभिन्न अभ्यास समेत गराउने बोर्डको तयारी छ।
