मोरङ । रंगेली नगरपालिकाको ३८ किलोमिटर सडक निर्माण योजनाअन्तर्गत वडा नं. १ स्थित स्कुल चौकदेखि बेलबारी सिमाना (समावेशी चौक) सम्मको ४.६ किलोमिटर सडक खण्डमा कालोपत्रे गर्ने कार्यको औपचारिक शुभारम्भ गरिएको छ। बहुवर्षीय योजना अन्तर्गत रहेको सो सडक निर्माणको कुल लागत ४५ करोड ६४ लाख ८२ हजार ७४७ भिओ सहित रुपैयाँ रहेको छ।
उक्त कालोपत्रे कार्य रंगेली नगरपालिकाकी उपमेयर भुमा पराजुलीको संयोजकत्वमा सुरु गरिएको हो। कार्यक्रममा वडा नं. १ का वडाध्यक्ष महेश खनाल, वडा नं. २ का सन्तलाल खवास, वडा नं. ३ का भरत प्रसाई, वडा नं. ४ का अवधेश मण्डल, वडा नं. ५ का महानन्द मण्डल, वडा नं. ६ का सुजित मण्डल, वडा नं. ७ का रामचन्द्र मण्डल, वडा नं. ८ का ढकप्रसाद आचार्य, ९ का चुडामणी रेग्मी , नगर सचिवालयका प्रमुख करण ठाकुर, रंगेली प्राविधिक टोली तथा स्थानीयवासीहरूको उल्लेखनीय उपस्थिति रहेको थियो।
यो सडक हुलाकी राजमार्गको कर्सिया सडक खण्डसँग जोडिएर बेलबारी सिमानासम्म पुग्ने भएकाले यसले स्थानीय जनतालाई दैनिक आवागमनमा ठूलो सुविधा पुर्याउनेछ। साथै व्यापार, शिक्षा, स्वास्थ्य तथा अन्य सामाजिक सेवाहरूमा सहजता ल्याउने अपेक्षा गरिएको छ।
रंगेली नगरपालिकाले भौतिक पूर्वाधार विकासमार्फत स्थानीय जीवनस्तर उकास्ने आफ्नो प्रतिबद्धता यस परियोजनाबाट पुनः पुष्टि गरेको छ।
