डाईनीयाँ । सुनवर्षी नगरपालिका–९ स्थित आदर्श माध्यामिक विद्यालयका प्रधानाध्यापक चित्र राजवंशीमाथि दुर्व्यवहार गरेको आरोपमा पक्राउ परेका ईश्वरलाल राजवंशीलाई रिहा गर्न माग गर्दै नेपाली कांग्रेसले चक्काजाम गरेको छ । राजवंशीलाई पक्राउ गरेको विरुद्धमा डाईनीयाँ चोकमा नेपाली कांग्रेस सुनवर्षीले चक्काजाम गरेको हो ।
प्रधानाध्यापकमाथि दुर्व्यवहार गरेको आरोपमा पक्राउ परेका राजवंशी नेपाली कांग्रेस सुनवर्षी–९ का वडा सचिव हुन् । आफ्ना कार्यकर्तालाई पक्राउ गरेको भन्दै कांग्रेसका नेता कार्यकर्ताहरुले डायनीयाँ चोकमा शनिबार आधा घण्टा चक्काजाम गरे । नेपाली कांग्रेस नेता कार्यकर्ताहरु सहभागी भएर गरिएको चक्काजामका कारण केहीबेर सडक अवरुद्ध समेत भएको थियो ।
उनीहरुले प्रधानाध्यापक चित्र राजवंशीविरुद्ध नाराबाजी समेत गरेका थिए । चक्काजामपछि गरिएको कोणसभालाई सम्बोधन गर्दै कोशी प्रदेश सदस्य अमरेन्द्र कुमार साहले आफुहरु बाध्य भएर चक्काजाम गर्नु परेको बताए । उनले प्रधानाध्यापक राजवंशीले भ्रष्टाचार गरेपनि स्थानीय सरकारले कारबाही नगरेको बताए । उनले कांग्रेस वडा सचिव ईश्वरलाल राजवंशीलाई षड्यन्त्रपूर्वक पक्राउ गरेको समेत आरोप लगाए ।
त्यस्तै, कोणसभामा नेपाली कांग्रेसका पूर्व महासमिति सदस्य मोहताव आलमले असार १५ गतेसम्म विद्यालयको जग्गा ठेक्का नलागेको थाहा पाएपछि आफुहरुले प्रधानाध्यापक र विद्यालय व्यवस्थापन समितिलाई अग्रिम जानकारी दिएर डेलिकेसन गई ठेक्का लगाउन दवाव दिएको बताए । उनले विद्यालयको बेतिथी सुधार गर्न आफुहरुले भनेपनि उल्टै अभद्र मुद्धा दर्ता गरि इश्वरलाल राजवंशीलाई पक्राउ गरेको बताए । उनले निर्दोष रहेका वडा सचिव राजवंशीलाई तत्काल रिहा नगरे कडा आन्दोलनमा उत्रने चेतावनी दिए । उनले भ्रष्टाचार गरेपनि सुनवर्षी नगरपालिकाले प्रधानाध्यापकलाई संरक्षण गरिरहेको आरोप समेत लगाए ।
कोणसभामा आलमले १५ गतेपछि विद्यालयमा डेलिगेशन गएको भनेपनि कांग्रेस र केही माआवादीका नेताहरु १३ गते विद्यालय पुगेको प्रधानाध्यापक राजवंशीले बताएका छन् । उनका अनुसार असार ९ गते विद्यालयले निर्णय गरि ठेक्काका लागि ११ गते सूचना प्रकाशित भएको थियो ।
उक्त ठेक्काको अवधी असार १८ गतेसम्म थियो । तर, ठेक्का खोलेको समय सकिनु ५ दिन अगाडीनै विद्यालय पुगेर ठेक्का नलागे ४०५ मन आफुले तिर्नुपर्ने भन्दै हुलहुज्जत गरि दुर्व्यवहार भएको प्रधानाध्यापक राजवंशीले आरोप लगाएका छन् । ‘भित्रि रुपमा ठेक्का नलगाओस भन्ने उहाँहरुको कुरा थियो ।’ उनले भने,‘ठेक्काको सूचनाको मिति सकिएर नलागेको भए एउटा कुरा होला । तर, ५ दिन अगाडीनै आएर विद्यालयमा हुलहुज्जत गर्दै ममाथि दुर्व्यवहार गर्नुका कारण के हो ? ठेक्का नलगाउनु भनेर होइन ? अहिले विद्यालयको फाइदा हुने गरी १४ सय २० मनमा ठेक्का लागेको छ । उहाँहरुको प्रयास असफल भयो । त्यसैले म विरुद्ध लागेका छन् ।’
प्रधानाध्यापक राजवंशीले पक्राउ परेका कांग्रेस वडा सचिव राजवंशी र अर्का माओवादी केन्द्रका स्थानीय नेता अजिमउद्दिनविरुद्ध विराटनगरस्थित सरकारी वकिल कार्यालयमा निवेदन दिएका छन् । सोही आधारमा राजवंशीलाई प्रहरीले पक्राउ गरेको हो ।
प्रधानाध्यापक राजवंशीले विद्यालय हाताभित्र ‘स्टाफ रुम’ मै प्रवेश गरि आफ्नो मानमर्दन हुनेगरी धाकधम्कि, गालीगलौज र दुर्व्यवहार गरेकाले न्यायको याचना गरेको बताए ।
